Garo Hills ni MP Agatha Sangmani kosako ma∙mongni schemerangko chu∙soke kam ka∙e on·jaha ine BJP dolni President Nikman G. Momin ni matnange agananirangna Chief Minister Conrad Sangma, MP ni palo aganchakaniko dakangskaha. MPLAD ni kamrangko covid ni somoionin Tura constituency osan ong∙aigija a∙song gimikon ma∙mong sorkari dontongataha ine Sangma aganangaha. MP scheme rangko BJP chi dilenggipa NDA sorkarian dongtongataha aro iako dolni BJP President o sing∙genchimode uan name ma∙sibatgen ine Sangma aganangaha.
Pilak ma∙mongoni sokbagipa schemerang jekai PMGSY, Jal Jeevan Mission aro gipin project rangni kamrangko MP ni niroke dakdilanichisa ra∙bana man∙aha ine CM janapangaha. Iasan ong∙aigija ma∙mongoni kamrangko MP ni didiata aro ge∙etani donggija maming dakna man∙ja ine Sangma aganangaha. A∙dokni nanganirangna ma∙mong sorkarini Minister rang baksa MP agangrike indakgipa ma∙mongni schemerangko ra∙bana man∙a aro manderangna donnugijan kamrangko ka∙enga ine Sangma agandapangaha.
