Mijal salni bako Williamnagar Garo Students’ Union (GSU) Eastern Zone nigita poraienggipa chatro chatrirangna scholarshipko on∙anio namen ja∙manchakengani a∙selo neng∙nikanirangko man∙enga ine a∙dokni skotong Minister Conrad Sangma na chitti see on·angaha.
Batanggimin November jani 20 tariko a∙dokni Education Minister antisa ba antignini gisepon scholarshiprangko man∙anggen ine aganmangenchimoba, poraigipa chatro chatrirangni porikka sena tangka gamna on∙gimin sal aro tarik batpilahaoba man∙kujaengani a∙selo namen neng∙nikanirangko man∙angaha ine chittio janapataha. Ia neng∙nikanirangko niate ta∙rake kamrangko ka∙atpachina aro chatro chatrirangna scholarshipko ta∙rake sokatpachina GSU Eastern Zone ni President Goera R. Sangma, Secretary Alex D. Shira aro gipin dilgiparang a∙dokni skotong Minister ko gronge chittiko on·angaha.
