West Garo Hills, District Commerce & Industries Centre (DCIC) Tura, Christmas Sales day ko office-tang Dakopgreo mijal salo ong·atangaha. Pilak pala sim·aniko dakna skang a∙jani Additional DC, Winje G Momin ni jakchi oprakaniko dakangaha. Tura DCIC ni General Manager Don Felicent R Marak, aro unbaksa gipin officerrangba ia somoio re·bae bakko ra·angtokaha. Ia sales day-ona Tura jillaoni aro wilwilao donggipa biaprangoni bang∙a manderang palchakram a·damona re·bae bosturangko niangan baksa an·tangtangna breangtokaha ine koborna parakataha.
DCIC ni Functional Manager, Ferdinand Sangma ni agantalatangani gitade ia sales day o palenggipa bosturang DCIC ni dingtang dingtang Departmental Training centres aro Training Schemes rangnigita skie ra∙mangimin manderangni tarigimin bosturang ong∙a ine janapangaha. Sales day o Gambegre Training Centre ni wa∙a aro re-oniko tarigipa bosturang, Cherangre Training Centre oni silniko tarigipa bosturang, Asanang aro Dakopgre Training Center o tarigimin sika koani bosturangko kraa damo palangaha ine parakataha.
