Adita salrangna skang Meghalaya Teachers Eligibility Test (MTET) porikkako seanio Upper Primary gadangni gnigipa paper-o on∙sogimin sing∙anirangna aganchakna tarigiminrang kakket ong∙gijani a·selo porikka segiparangna jajaataniko on∙aha ine parakataha. Iani a∙selo MTET porikkako gisiko nange chu∙sokna segiparangna adita ding·chaoatanirangko dakangaha.
Iani bidingo MTET porikkako segiparang Directorate of Educational Research & Training (DERT) Shillong-na nirokate kam ka∙atpachina mol∙molate December 6 tariko chittiko sedoataha. Porikka segiminrangni aganchakaniko name che∙eme aro kakket ong∙aniko mesoke dakna man∙agita name nipilchina didianikoba on∙angaha. Unbaksana, mikkangchi neng∙nikanirangko chagrongjanagita porikka segiparang baksa tale agangrike nambata ja∙kurangko de∙na nanganikoba u∙iatangaha.