South Garo Hills a·jani Garegittim Nokma a∙kingni ning∙o ga·akgipa Sawebri A∙bri songo u∙ina man∙gijagipa manderangni koelako bikotenganina December 6 tariko Nongalbibra pulis thanao mokordomako ka·angaha. Nokmani ma·sie janapatanigitade uamang songni Nokmao aro maharirango sing∙chenggija niamni a∙palo koelarangko bikotenga ine u·iataha.
Mokordoma ka·doanggipa Westonsing, ia niamni a·palo kamko ka·enggipa manderangni kosako am∙sandianiko dake niamo pangchake kraagipa sastiko on∙china didiangaha. Ia ong·enggipa obostani bidingo Nokma aro jolo songdongenggipa manderang jako ra∙e kam ka∙enggipa dolrangko nirokatpachina aro dakchakaniko on∙pachina mol∙molanikoba dakangaha.
