Mijal salni bako Jengjal o Me·gong Festivalni bon·kamgipa salo chong·motan December 9 tariko “Literature for Cultural Preservation” katta bichongko ra·e Tura Me·gong International Literary Festival ko skanggipa changna ong·atangaha.
Tom·aniona a·dokni skotong Chief Minister Conrad K. Sangma mongsonggipa sokgipa ong·aha. Unbaksana West Garo Hills a·jani DC Jagdish Chelani, 100th BSF Battalion ni Commanding Officer Ajay Kumar Tiwari, WGH a·jani SP Abraham T. Sangma aro bang·a adita poedo aro golpo segiparangba re·bae bakko ra·angaha.
Maniani bako ALS ni President Prof. Caroline R. Marak ni ‘Aristotle Art of Poetry’ ki·tapko A·chikkuona pe·e Aristotle Poedoni Art aro Rhinkle M. Marak ni segimin ki·tap ‘Kambe Ganda’ (Songsarni golpo) ki·taprangko, CM aro gipin mongsonggipa sokgiparangni jakchi oprake on·angaha.
Tomani bako Bangladesh a·songoni re·bagipa James Kalyan Ritchil, Snigdha aro Choity Mankin, kusi aro ka·dimean baksa A·chikrangni ku·mong nangrimanina gitko ring·mesokangaha.
Ia somoini bako DBC Principal, ALS memberangko Literary Fest ko ong·atanina agangiparangoni bang·aan mittelangaha. Jatni nisan ba chin an·chingni dakbewalrang ong·a, iarangko nirokna simsakna aro ripingna nanga maina iarangko ripingjaode jat gimaona soka ine CM Conrad Sangma aganangaha. A·chik chadamberang somoini gita dingtangrorogenchimoba aro gipin gitalgipa daka rikarangko ja·rikgenchimoba A·chikrangni ong·baaniko gualna nangja ine CM aganangaha. Mikkangchi jatni daka rika, sea jotaniko ripinganio aro uandakgipa kamrango Chief Minister dakchakaniko on·anggen ine aganangaha.
