Da∙al salni bako North Eastern Hill University (NEHU) Tura campus o NEH Scheme nigita salsana Citrus Biodiversity Fair aro PGR Conservation Awareness Programme tom∙bimonganiko ong∙atangaha. Ia salsana tom∙aniko Meghalaya a∙dokni Indian Council of Agricultural Research (ICAR) National Bureau of Plant Genetic Resources (NBPGR) Umiam Regional Station NEHU TURA, Horticulture Department baksa nangrime ong∙atangaha.
Ia tom∙anio NEHU ni Vice Chancellor Professor P. S. Shukla, NEHU Tura Horticulture Department ni Skotong Professor C.P. Suresh, New Delhi NBPGR Science ni Principal Dr. S.K. Malik, Umiam NBPGR ni Scientist Dr. Subarna Hajong aro USA, University of Florida ni Professor Frederick Gmitter ba re∙bae bakko ra∙angaha. Unbaksana Garo Hills ni adita dingtang dingtang biap aro a∙jarangoni ge∙e game cha∙giparangba re∙bae tom∙bimonganio bakko ra∙angaha.
Tom∙anio ge∙e game cha∙giparangna narang biterangni bidingo adita agantalatanganirangko dakangan baksana narang biterangko ripingani aro simsakani bidingoba aganskie on·angaha. Tom·bimonganio adita ge∙e game cha∙giparangna dingtang dingtang jatni narang chararangko aro adita ge∙a gamani bosturang jekai a∙sal, kodal rangkoba suale on·angjolaha. Ia tom∙bimongani bako Citrus Biodiversity Fair koba NEHU Tura campus o ong∙atangaha. Ia biodiversity fair o Garo Hills ni dingtang dingtang biaprangoni narangni jatrangko ge∙e game cha∙giparangna rokomari narangni biterangko mesokan baksa agantalate on∙angaha.
