Mission Parivar Vikas ni ning∙o Saarthi Awareness on Wheels-ko Mendipathar PHC ni ning∙o donggipa Hatibasa songni antidamo mijal salni bako programmeko ong∙atangaha. Ia programme-o nokdangko rikna niksamsoe kam ka∙na nanggnirangni bidingo sanna bannaniko dakenggipa dolrang u∙iate on∙a miksonge ong·atangaha. Tarisamsoani gri nokdangko rikanichi aro bang∙e bi∙sarangko ba∙anichi, nokdangni ma∙gipani an∙seng baljokanirangko nosto ka∙an baksana nokdangni mande sakantinan neng∙nikanirangona sokbaatani bidingo agantalate on·angaha.
Indakgipa neng∙nikanirangko komiatna ia tom∙anio dingtangmancha bia ka∙daldalgipa jikma jiksena bosturangko on∙angaha jeon bi∙sa man∙aoniko komiatna jakkalgipa sam, condom, napkin aro nokdango bi∙sa badita sak dongode kusi ong∙gipa nokdang ong∙na man∙ani bidingo talate on·gipa lekka ki∙taprangkoba sualangjolaha.
