EGH, Williamnagar songjimani Warima jolo na·tokrangko simsake ripinge donenggipa chiringoniko ma·sina man·gijagipa manderang Mongolbar waljatchini somoio bisi on·e Kg 200 na batpile na·tokrangko cha·uangaha ine koborna parakataha. Ia obostako pringni somoio songdongenggipa manderang na·tokrangni balboe dongako nike jako ra·e kam ka·enggipa manderangna u·iataha ine parakataha.
Ia kragijagipa kamko ka·gipa manderangni kosako pulis thanao badi ka·dongaha aro Fishery Officer Kangku Oliver Sangma-na u·iatan baksana sigimin na·tokrangko cha·una jakkalgipa bisiko name ma·sina porikka ra·na watataha ine koborko parakataha. Williamnagar songjinamao palenggipa sigimin na·tokrangko songdongenggipa manderangko naljokatna man·agita ra·e cha·jachina Fishery Officer ge·etaniko dakangaha.
Ia ripinge donenggipa Simsang chibimao bang·a rokkomni na·tokrang jekai narong, nawak aro indakgipa dingtang dingtang jatni na·tokrangni dongchakram ong·a. Ia na·tokrangko ripinge donenggipako 2013 bilsioni sorkari a·bachengdile songni manderangko nirokataha, jekon tourismni a·bako tang·doatna aro chibimao jillanirangko bariatna miksonge dakangaha.
