A·doko gitalgipa pulis thana rangko ra·bachina bang·a dabianirang donggenchimoba, uarangko a·bachengna skang da·o dongsogimin pulis thanarangko namdapatna aro bilakbatatna kamrangko ka·chengna nangenga ine Chief Minister Conrad Sangma mijal salo aganangaha. Indakgipa obostarang ong·genchimoba sorkari ia dabianirangko niangenga ine Sangma parakangaha.
A·dokni dingtang dingtang pulis thanarango chu·ongagita pulisrangko dona sak 2000 mang pulisni kamna rimnapaniko dakna miksonganian sorkarini skanggipa nisan ong·enga ine Sangma aganangaha.
Ia miksonganiko chu·sokatanian dongsogimin pilak pulis thanarango chu·ongagita kam ka·gipanirang, silchidarerang, gari gora aro gipin nanganirangko chu·gimik tang·doatani ong·gen ine Sangma aganangaha. Iarangko chu·sokatani ja·manosa gital dabiarangko nigrike re·mikkangna man·gen aro kamrangko gadangni kri sulsul ka·na nanggen ine Sangma agandapangaha.
