A∙doko digital health services gita nambate sanna bannaniko on∙a Ayushman Bharat Digital Mission ni gita South West Garo Hills, Ampati Civil Hospital o ABDM Scan & Share aro e-Hospital (NEXTGEN) ko a∙bachengate on·angaha. Ia gital kol ba ostrorangko a∙jani Additional Deputy Commissioner Y M. Momin ni jakchi da·alo oprake on·angaha.
Ia program-ona Ampati Civil Hospital ni Medical Superintendent Dr. Denisha Momin, NIC Meghalaya-ni Scientist Enoch A. Sangma, SDMHO Dr. Suparna Hajong, ABDM ni State Programme Coordinator Sandy Osmond Khongmawpat, District Nodal Officer Dr. T N.Sangma, ABDM ni gipin officialrang, District NIC ni dolrang, aro hospital ni gipin staff rang bakko ra·angaha.
Ia programo Sandy Osmond Khongmawpat ni dilanichi ABDM dolrang National Health Authority ni tarigipa sanna bannanio jakkalna Scan & Share jean QR code o pangchakaniko jinmana dakmesokangaha. Iako jakkalanichi sanna bannaniko dakna hospitalona re·baenggipa manderangko OPD o biming segatanirango ritingo chadenge sengaoniko dontongate nengrabatatna dakchakanggen. Una agreba e-Hospital-ni bidingo Enoch Sangma Hospital conference hall-o adita taldapate on∙anikoba dakangaha.
E-Hospital ko Meghalaya a·dokni damsni sorkari hospitalrango a·bachengate on·enga aro ianoni Tura Civil Hospitalni ja·mano Ampati Civil Hospital-an Garo Hills o Scan & Share aro e-Hospital (NEXTGEN) ko gnigipa a·bachenggipa ong∙enga ine parakangaha. South Garo hills a·jao ABHA o biming segatgipa sak hajal 80 mangna bate dongani gimin ABDM Ampati Civil Hospitalo iako a·bachengatna tik ka∙angaha.
