East Garo Hills-o bilsirikit manirongenggipa Simsang Festival 2023 ko da·al salni bako a·jani Deputy Commissioner, Vibhor Aggarwal oprakenba a·bachengate on·angaha. Ia manianiko dingtangmancha pekatgipa bosturangko jakkalaniko champengna ‘Say No to Drugs’ katta bichongo pangchake Paroa do·orangko jakgitele wataniko dakange Rongrenggre Government Higher Secondary School, Williamnagar-ni kal·chakram biapo a·bachengatangaha.
Ia manianiko December 15 aro 16 tarikona Williamnagar District Administration jako ra·e ong·atangenga jeon bang·a ring·salani, kal·susaani aro dakmesokanirangko niknagita man·anggen. Salgnina ong·atenggipa ia manianiona Garo Hills ni doka damao mingsinggipa dolrang jekai Riprap, Haystack Ladies, The Do·pos aro Nokpante dolrang ring·salaniko dakanggen. Unbaksana jatni dingtang dingtang kal·susaanirangko, daksninganirangko, beach volleyball, bi·sarangko kal·susaatani aro fancy dress gane susaatanirangko ong·atangenga. Iasan ong·aigija Dakmanda dress competition aro Orange & Rice Mangsang festival 2023 koba ong·atanggen ine parakataha.
