Mijal salni bako Tura DC Park, Chess Arena o Tura Cosplay Community, West Garo Hills Deputy Commissioner, Meghalaya Grassroots Project aro Ku∙rongdik Media House baksa nangrime gittamgipa Annual Cosplay Event ko ong·atangaha. Gittamgipa Annual Cosplay program ong·atanggipao Tura aro gipin biaprangoniba chu∙gimiko sak 15 chadamberang re∙bae bakko ra∙angaha.
Iano bilsi 16-25 ni chadamberang gisiko nangbee bakko ra·angaha. Cosplay o bakko ra∙giparang an∙tangtangni changa sapaniko mesoke Anime ni cholon bewal baksa ma∙gape an∙tangtangko tarienba dakmesokangaha. Cosplay ko mingsingbegipa Anime jekai Bleach, Naruto, Tokyo Ghoul aro One Piece ni bimango tarie dakmesokako nike nina re∙bagiparang an∙saoangaha. Cosplay o dakmesoke bakko ra·giparangna bosiskoba on·angaha. Ia dakmesokanio Fake Fairy chegipa ong∙e tangka gong hajal 10 ko boksis man·aha, Saylee gnigipa biapo ong∙e tangka gong hajal 7 ko boksis man·angaha aro YUXo Saed gittamgipa biapo ong∙e tangka gong hajal 5 ko man∙angskaaha.
