Garo Hills o ring·salni a·bao mingsinggipa Riprap dolni Browny Marak na Rangsakona ni MLA Subir Marak Swift gari ko on·anga. Ia on·pilskaaniara Marak ni Garo Hills ni doka damanio an·tangko on·kange uni ka·srokgipa katta aro sulrangko tarie dangdike on·anina ong·a ine ma·sina man·aha.
Riprap dolrang Garo Hills ni manderangna uamangni knatobegipa git rangko bilsi 30 na baten da·ona kingkingba ring·salni a·bao dangdike on·enga aro nambatsranggipa dolrangoniba ge·sa ong·engkua. Uamangni ia ring·salani a·bao gisik nangbee katta ning·tugipa gitrangko tarianichi knatimsogipa manderangna aro doka damanio gisik nanggiparangna namgipa didiani baksa dakmesokaniko on·a.
