Re·anggipa December 11 tariko Rangsapara Secondary skulni skigipa sakgni an·tangtangni dormahako bikote Nongstoin-oni re·bapilengmiting somoio West Khasi Hills Langpih ramao u·ina man·gijagipa manderangni tangka paisarangko ra·sekan baksa ka·saninggija doka satanichi saksa skigipa saknaako man·aha aro sakgipin janggi galaona sokaha.
Indakgipa a·selo ong∙anio skigipa saksani janggi gimaanina Aradonga jolni nangrimgimin NGO-rang jekai GSU, FKJGP, AHAM, ADE, HNYM, AYWO, SHG, skulni chatro chatrirang, songni manderang aro toromko dilenggiparang apsan ku·mongenba suk ong·gijaniko parakangan baksa dosi dakgipa manderangni kosako raken jegalaniko dakangaha. Unbaksana dosi dakgipa manderangko ta·rake am·sandie rim·chinagita peace rally-ko dakangaha. Una agreba a·selo ga·ake sianggipa mandena kalimpaaniko mesoknagita candlelight service-koba dakangjolaha.
