Ge·a gamani gamchataniko gisik ra·na aro game cha·giparangni rakbee kam ka·anina uamangko mitelpilskanagita da·al salni bako North Garo Hills, Resubelpara o Farmer’s Day ko maniangaha. Ia salko gisik ra·e manianiona a·dokni Chief Minister Conrad K. Sangma mongsonggipa ong·e sokbae ge·e game cha·giparangna uni namgipa skaniko on·angaha.
Ia tom·bimonganiona Deputy Speaker aro Resubelpara ni MLA Timothy Shira, PHE Minister Marcuise Marak, Mendipathar ni MLA Marthon Sangma, Kharkutta ni MLA Rupert Momin, Bajengdoba ni MLA Pongseng Marak, MDC Aldo Sangma, Project Director Jude Rangku T. Sangma, BDO Verdi Sangma, gipin officialrang aro a·jani dingtang dingtang Producer Group ni manderang dongpae bakko ra·angaha.
Deputy Speaker Timothy D. Shira programo aganangengon ia somoirango game cha·giparangni ge·e man·gimin biterangko sorkarini dingtang dingtang cholrangko ra·abanichi pala simaniko nengrabate dakna man·engaha ine aganangaha.
Meghalaya a·doko songdonggiparangoni 80 percent mangnigita ge·a gamanio pangchake janggi tanggiparang gnang ine Conrad Sangma aganangaha. Farmer’s Day ko maniani miksonganiara game ge·e cha·giparangni kamna mitelpilskaaniko on·e, sorkarini ra·gatgimin scheme FOCUS o pangchake uamangni janggi tangani gadangko tang·doatna gita kam ka·ani ong·a ineba Sangma agandapangaha. Unbaksana buring bolgrimrangko ripingna song nokni manderangna Payment for Ecosystem Services (PES) nigita tangka paisarangko on·e dakchakani aro chadamberangna YESS Meghalaya-ko ra·bae bang·a dakchakaniko on·enggipao sakantikon bak ra·e scheme-ni namgniko ra·china Sangma didiangaha.
Ia maniani gisepo Garo Hills ni dingtang dingtang a·jani dam 16 processing unit-rangko oprake on·angan baksana game cha·giparangna FOCUS ni gita tangka paisarangko Producer Group rangna suale on·angaha. Unbaksana YESS Meghalaya, PES aro Working Capital Loan nigita dingtang dingtang dolrangnaba sorkarini ra·gatgimin scheme o pangchake tangka paisarangko suale on·angjolaha.
