Re·baenggipa 2024 Lok Sabha pu·onanio Tura Parliamentary constituency o Gambegre ni MLA Saleng Sangma aro Williamnagar-ni gitcham MLA Deborah Marak Congress dolnigita susana gisik nanganiko parakangaha ine Congress Legislature Party ni dilgipa Ronnie V Lyngdoh koborna parakataha.
Uamang sakgnina agreba adita dilgiparang susapana gisik nanganiko mesokangaha jeon dolnigita adita somoini ja·manosa u·iate okamaniko dakangggen ine Lyngdoh aganangaha. Doloni susanagipako seokengon gimiknigita nigrikesa nambatgipa dilgipana susana cholko on·anggen ine Lyngdoh aganangaha.
Shillong parliamentary biapo da·o ong·enggipa MP Vincent Pala susataina miksongenga jeon chepiltainagita namen ka·dongsoenga ine Lyngdoh aganangaha. Unbaksana re·baenggipa Autonomous District Council rang jean KHADC aro JHADC pu·onanioba tarisamsoaniko dakengaha aro susanagita gisiko nanggipa dilgiparangna u·iatanggen ineba Lyngdoh agandapangaha.
