Meghalaya adoko Class 10 ni gadango poraienggipa chatro chatrirang skul re·aniko dontonggiparang 2021-22 bilsini gisepo 20.6 percent mangnigita ong·enga ine ma∙mong sorkarini Education Minister Dharmendra Pradhan seachi parakataha. Chadamberangni skul re∙aniko dontonganio, Odisha a·doko 49.9 percent aro Bihar o 42.1 percent nigita donga jekon Meghalaya a·dokba ja·rikangengaha ine janapataha.
Odisha aro Bihar a·dokrangna agreba gipin a∙dokrang jerangon skul re∙aniko dontonggipa bang∙en donga. Meghalaya a∙dok 33.5 percent, Karnataka 28.5 percent, Andhra Pradesh, Assam aro Gujarat 28.3 percent, Telangana 27.4 percent rang ong∙enga ine Union Education Minister parakataha. Je a∙dokrangan 10 percent na komie skul re·anirangko dontonggiparangara Uttar Pradesh 9.2 percent, Tripura 3.8 percent, Tamil Nadu 9 percent, Manipur 0 percent, Madhya Pradesh 9.8 percent, Himachal Pradesh 2.5 percent, Haryana 7.4 per cent aro Delhi 1.3 percent ong∙a ine parakataha.
2022 bilsio sak 1,89,90,809 chatro chatrirang porikkako segiparangoni sak 29,56,138 chu∙sokna man∙jaha. Class 10 ni gadango skul re∙aniko dontongatani aro porikkao chu∙sokgijani a∙selrangara skul re∙na aratani, skulni niamrangko ja·rikgijani, poraina aratani, porikkarango sing∙anirang rakani, Ma·a paarangni dakchakgijani, namgipa skigiparang aro poraichakna namgipa skul nokrang, kutturi rang dongjani a∙selo ong∙a ine DMK MP Kalanidhi Veeraswamy ni sing∙anina Pradhan aganchakangaha.
