Da∙al salni bako Agricultural Technology Management Agency (ATMA) West Garo Hills, Department of Agriculture & Farmers Welfare aro ICAR, Krishi Vigyan Kendra (KVK), West Garo Hills baksa nangrime Matchakolgre LP Schoolni kal∙chakram biapo game cha∙giparangna uamangni man∙gimin me∙su samjak aro bolam biterangko palanirangko daknagita Kisan Mela-ko ong∙atangaha. Kisan Mela tom∙aniona a∙jani Additional Deputy Commissioner AB D. Shira mongsonggipa sokgipa ong·e bakko ra∙angaha. Unbaksana West Garo Hills ni DAO aro ATMA ni PD, K Sutnga aro West Garo Hills ni Joint Director of Agriculture B Hajong ba re∙bae bakko ra∙angaha.
Unbaksana adita ge∙e game cha∙giparang aro Tikrikillla Blockni Horticulture Development Officer, College of Community Science Central Agricultural University (Imphal), ICAR, Krishi Vigyan Kendra, WGH aro Agriculture departmentni officialrang bakko ra·angaha. Ia melako ong·atanichi game ge·e chagiparangna dingtang dingtang u∙i masigipa officialrang baksa ge·a gamani bidingo agangrikna cholkoba on∙angaha.
Una agreba ia melao game ge·e cha·enggiparang an∙tangtangni game mangimin me∙su samjak, bolam biterangko, noktangtango tarigimin cha∙ani bosturangko aro jila kaanirangko palanikoba dakangaha. Ia melako ong∙atanichi game ge∙e cha∙giparang aro ge∙a gamanio u∙i masigipa officialrang baksa sepangbate kam ka·na cholko on·angaha.
