Mijal salni bako cabinet tom·aniko dake Captain Williamson Sangma State University Amendment Bill ko rachake kamrangko ka·nagita ge·etangaha. Tom·ani ja·mano kobor ra·timgiparangna parakangengon Captain Williamson Sangma Technical University ko State University ona ra·dona cabinet bakroataha ine Chief Minister Conrad Sangma aganangaha.
University ni billko dingtangatna skang adita sing·anirang gnang jekon Governor, Education department aro gipinrang baksa chanchirimani ja·mano UGC ni adita donggimin niamrangko ra·chakangaha jean Captain Williamson Sangma State University Act ni bak ong·gen ine Conrad Sangma aganangaha. Indake ong·engon University ni board of governors, board of management aro gipin bako on·giparang UGC ni dakna nanggniranggita ong·anggen ine Sangma aganangaha.
University ni mongsonggipa campus Tura o ong·gen jekon mikkang bilsioni a·bachengatna pilak kam ka·gipa manderang aro nangarangko dakna ta·rake ja·ku de·angenga ine Sangma parakangaha. Unbaksana University ni bakko a·dokni gipin biaprangoba ra·bae on·a chanchianirangba gnang ine Sangma agandapangaha.
