Tura oni km 15 mang chel·ao donggipa Rongram to chipgipa station sepangoni SBI ATM oniko, paisa chipchakgipa baksoko gas chi so∙e ratani bostuko jakkale gong lakh 30 ko bikote cha∙auangaha. Ia ong·a obostako da∙al pringo manderangni paisa bikotna re∙angmiting somoiosa u∙ina man∙aha.
Bank-ni officialrangni agananigitade lakh 30 na bate tangkarangko cha∙uangaha ine parakataha. Cha·uanggimin tangkarang badita mancha donga uko kakket ong·e ma·sina am·sandianiko dakenga ine West Garo Hills ni SP Abraham T. Sangma janapataha.
Cha∙ugiparang gaschi so∙gipako jakkalan baksana sepangbatgipa CCTV camera rango rongrangko satani a·selo manderangni mikkangrangko camera o u∙irikna man∙jaha. Christmas sepangbatrikrik bang·a manderangni gari gorarango ong·kate roramaniko nike, cha∙ugiparangba waljatchio chol ra·e ATM ni do∙garangko kulichrake cha∙uangaha ine chanchipe u∙iataha.
