Tura songjinmao bike salgipa saksa January 2 tariko ramao a·sel ong·e janggitangko gimaataha ine koborna parakataha. Ia ong·a obosta Babupara DC park sepang jolo PWD office mikango pring 2 bajimango ong·aha. Sianggipa mande Dombagre Millim songoni Grandstone Marak ong·a. Koborko man·soani gitade uamang damsa chrokgipa a·damona re·ange re·bapilmiting somoio ia a·selko chagrongaha ine u·iataha.
Ia a·sel ong∙anio bike ta∙rakbee sale truck bolsako batsekna jotton ka·on rama paksamsachini Alto gari re·baako niksojae chatinggrikaha. Uamang bilsubee chatinggrikani a·selo Grandstone Marak bike-oni tang∙ange truck garini ki∙sanggipa chakao nape re·jetdapa man·anichi janggiko gimaatna nangaha. Unbaksa gadopagipa Keang Momin adita saknaako man·e sanna bannaniko ra·enga ine u·iataha.
