A·dokni poraienggipa chadamberangna scholarship rangko on·a ja·manchakengani gimin North Eastern Hills University Students’ Union (NEHUSU) aro Hynniewtrep Youths’ Council (HYC) dolrang da·alo chatro chatrirangko okamchimonge MBOSE office mikkango tom·e sorkarini kosako jegalaniko dakangna miksonganiko u·iatangaha.
Chatro chatrirang scholarship rangko man·gija bilsisana batengaha ine NEHUSU ni General Secretary Banpynbiang Riang uni agananio janapataha. Ia tangkarangchin poraienggiparang dingtang dingtang nanganirang jekai cha·ani, nok para, fee aro sanna bannaniko ra·na dakchakenga jekon sorkari ka·saninggija dake on·gija donenga ine Riang aganangaha. Scholarship rangko man·kujani a·selo noktangtango pangchakna nangao ga·akenga aro iachi bang·a nokdangrangna neng·nikaniko ra·baenga. Ia neng·nikanirangko chagrongani a·sel poraianiko dontonggiparangba bat·rikrikengaha ine ua u·iatangjolaha.
Tangkarangko on·a ja·manchakaniara chatro chatrirangni man·gniko aro bidako ra·na bil amaniko sorkarini champengani ong·enga ine Riang parakataha. Sorkarini kragija dake chatro chatrirangko kal·akaniko bilake jegalaniko mesokna, uamangni man·gniko on·ja dipet MBOSE oni re·jitjawa ine NEHUSU-ni General Secretary u·iatangaha.
