Adita somoirangna skang Garo Hills Autonomous District Council (GHADC) ni tangka paisarangko jakkalsretani bidingo am·sandianirangko daknagita Lokayukta ni dongimin officialrangko ra·galpilanina saksa social activist Cherian Momin sing·doaniko dakataha. Ia dongimin officialrangko ra·galaniko koborrangko whatsapp gita a·dok gimiko giproroate kakket bichalona ra·bagijani ong·enga ine manderang u·inagita man·skaaha.
Ia am·sandianiko dakaniara Central Plan Scheme 2015-16 bilsio GHADC member rangna hostelko rikna gong crore 6.01 ko chamataoniko tangka paisarangko jakkalsretani bidingo ong·a jeon sak 9 gitcham executive member rangko badi ka·angaha. Jako donggipa manderangoni saksa da·o ong·enggipa MLA Sanjay Sangma aro sakgipinara GHADC ni gitcham Principal Secretary ong·a. Lokayukta ni am·sandianiko bilakbatatna dakchakanipal sorkari am·sandiairangko dakenggipa officialrangko ra·galskaaha ine Momin janapataha.
Meghalaya Lokayukta Act ko 2014 bilsio a·bachengenchimoba November 2018 onisa kamrangko ka·baaha jeon political manderangni ia Act ko ra·gatna simsakgijaniko aro am·sandie kakket bichalona ra·bana sikgijaniko mesokani ong·a ine Momin parakataha. Manderangni namgnina chamatgipa tangka paisarangko jakkalsretani ba chabokanirangko am·sandie kakket bichalona ra·banagita Lokayukta ko a·bachengatani ong·a aro district council na chakpaaniko on·a nanga ine Momin janapataha.
Indakgipa am·sandianirangko daknagita Lokayukta ni officialrangko seoke on·ani ja·man ra·galpilaniara a·dok sorkarini dosi donggipa manderangko kakket bichalona ra·bana ba u·iatna sikgijani ong·a. Dosi dakgiparangni kosako name dake am·sandianirangko dakjani a·selo da·alonaba kakketgipa raiko on·a man·kujaenga ine Momin aganaha. A·dok sorkari maming u·iatanirangko on·gija am·sandianirangko dakgenggipa officialrangko ra·gale gital officialrangko songtaianiara mikkangchi mai ong·gnigipako agansona amgijani ong·a. Unbaksana indakgipa kamrangko ka·aniara batanggimin somoirango kakketgijagipa kam ka·anirangko a·dok sorkarini donnuani ong·a ine Momin janapangaha.
Lokayukta na jakgitele aro nambate kamko ka·na on·jagenchimode Lokayukta ko a·bachengatani namgni dongja jeon Lokayukta ni skanggipa Justice Mushahary ba a·dok sorkarini bakrime kam ka·gijani gimin namnikgija aganikoba janapjole Momin sing·doangaha. Bon·kame, a·doko indakgipa kakketgijagipa kamrangko ka·aniko gimaatnagita dingtangmancha nirok simsakaniko dakna ja·ku de·na nangenga jeon da·ona kingking Lokayukta ko a·bachengatani maming namgni dongjaenga ine Momin aganaha.
