Chatro chatrirangna scholarship rangko on·agita a·dok sorkari rakbee aro ta·rakalen sualatnagita kamrangko ka·genchimoba ia pilakan ma·mong sorkarinigita sualgipasa ong·e adita neng·nikarangko sorkarinigita chagrongenga ine Education Minister Rakkam Sangma parakataha. Ia scholarship-ara ma·mong sorkarini program ong·ani gimin kamrang chu·gimik a·dok sorkarini jako ong·ja ineba ua aganangaha.
Ma·mong sorkarini skanggipa installment o gong 52 crore chamatgipachi sak 67,026 oni sak 37,406 chatro chatrirangna sualataha. Gnigipa installment jean gong 65 crore ko man·ani ja·mano bangki dongenggipa chatro chatrirangna sualaniko dakanggen ine Sangma u·iatjolangaha.
Re·anggipa December jani 27 tariko ma·mong sorkarini Minister a·dok sorkari baksa agan golpogrike gnigipa installment ko chamatna kamrangko ka·engaha ine parakataha. Unbaksana utilisation certificate aro gipin lekka pancharangkoba watatmanaha ine Sangma agandapangaha.
