Da·al salni bako 5 gipa Meghalaya Games ko a·bachengatna torch relay ba bilcham ko so·e Shillong SSA Stadium oni Tura songjinmaona sokatnagita Sports Minister Shakliar Warjri ni jakchi oprake on·angaha jekon January ni 15 oni 20 tarikona dingtang dingtang kal·susaanirangko ong·atanggen.
Ia Meghalaya Games ko a·bachengatna bilcham ko so·e organiser rangna pakwatangna man·anina Sports Minister an·tangni kusi ong·aniko parakataha. A·doko sports ni a·bao Meghalaya Games an dal·batgipa program ong·a ine ua aganangan baksana susanagipa chadamberangna uni nambegipa skanikoba on·angjolaha.
Ia programko chu·sokatnagita sorkari gisik nangbee aro rakbee kam ka·anggen ine aganangan baksana a·dokni chadamberang an·tangtangni sapgipa gadango namdapate mikkangchi a·songna aro Olympic o kal·nagitaba ka·dongsoenga ine ua agandapangaha. Sports ni a·damo sapgipa chadamberangko didinagita aro mingsa janggi tangani cholko ra·gatnagita sorkarini miksonganiba ong·a ineba Warjri parakataha.
