A∙dokni chatro chatrirangni man∙gija dongenggipa scholarship rangko ta∙rakale sokatpachinagita Dobu Regional Unit ni A·chik Holistic Awakening Movement (AHAM) dolni dilgiparang Education Minister Rakkam Sangma na mijal salo chitti sedoataha. Uamangni seatgipa chittiko EGH a∙jani DC Vibhor Aggarwal ni jako AHAM dolrang on∙angaha.
A∙doko bang∙a chatro chatrirang chol ong∙pagijagipa nokdangrangoni ong∙e sorkarini on∙enggipa scholarshiprango pangchake poraigiparang ong∙anigimin adita neng∙nikanirangko cha∙grongna nangenga ine AHAM Dobu Regional Unit ni General Secretary Windam G. Momin chittio see janapataha. Bang∙a chatro chatrirang uamangni poraianirango admission fee, lekka-ki·tap aro tuition fee rangko gamnagita scholarship o pangchake ka∙donggiparang ong∙paani gimin somoigita uamangna scholarshiprangko on∙atna man∙genchimode bilonggen dakchakbeani ong∙gen ine Momin janape seataha.
Ia neng∙nikanirangko nirokatpachinagita AHAM dolrang a∙dok sorkariko ma∙mong sorkari baksa agangolpogrike seng·gnangkale a∙dokni chatro chatrirangna scholarship ko sokatpachina mol∙molaniko dakangaha.
