U-23 men’s Col. CK Nayudu Trophy na Rangpo, Sikkim o Meghalaya dol baksa Sikkim dolrang kal·susaanio, Meghalaya dolrang 328 run rangchi nengrabee amchepataha. Kal·susaanio Manish Sharmani nambee robol goe on·anichi Meghalaya ni robol gogiparangni gisepo saksa nambatgipa ong·e itihaso bimungko tariangaha.
Meghalaya dolrang skanggipa innings o 113 run rangko man·aha aro Sikkim dolrang 91 run rangkosan man·rikaiaha. Indake mijalni kal·ani gnigipa innings o Meghalaya dolrang 370 run rangko man·e chu·gimik 392 run rangchi bate dongsoaha. Meghalaya dolna Kevin Christopher (Captain) century doke 300 run rangna bate tariangaha. Sikkim dolrang over 40.5 o 64 run kosan man·e Meghalaya dolni tarigimin 393 run ona sokdonagita namen neng·nikani ong·angaha.
Sikkim dolna doke on·giparangoni sakgnina agre 10 run rangni kosako man·jaha jeon Manish rong 11 prakni gisepon wicketrangko ra·nagita man·angaha. Manish ni wicket man·rikgijagipa sakgnioniko, saksako Aryan Borah aro sakgipinko Abhishek Kumar ra·angskaaha. Meghalaya dolrang Gujarat ona re·ange, January 14 tariko Manipur baksa Surat o susaangskagen.
