A·doko Jal Jeevan Mission (JJM) ni kamko ka·anio chu·sokgipa ong·jaenga ine matnanganiara Lok Sabha pu·onani somoi sepangbaengahani giminsa politics kal·na joton ka·anisan ong·a ine PHE Minister Marcuise N. Marak aganchakatskaaha. A·doko JJM ni kamrangko bimchipe ka·anichi 73.15 percent mangnigita matchotaniko niknagita man·aha. MP pu·onani somoi sepangani giminsa iako politics nigita chanchisamsoe matnanganiko dake manderangni gisikko bingbrangatna aro sorkari mamingkon kam ka·jaenga ine bebe ra·atna gitasan ong·a ine Marak aganangaha.
Batanggimin somoio GHADC ni gitcham MDC Balachanda Sofior Rahman ni WGH a·jao JJM ni kamrangko ka·gija tangka paisarangko bikote jakkalsretaha ine matnange ma·mong sorkarini Central Vigilance Committee (CVC) o badi ka·doaniko dakangaha. JJM ni kamrangko ka·anio tangka paisarangko maming dakeba gamsoani dongja aro projectko matchotani ja·manba name porikka ra·e, Geo-tag ka·esa kamko ka·gipa contractor ba companyna tangka paisarangko gamaniko dakronga. Ia kamrangni kosako maming dakeba manderangna togie tangka paisarangko jakkalsretani cholan dongja ine Marak jegalataha.
