Tura Civil Hospitalo 80-bedded hospitalna rika cho·anirangko dakani a·sel Covid-19 ward rama baksa nangdimgipa ramako January 21 tarikoni adita salrangna chipaniko dakanggen ine WGH ni Deputy Commissioner u·iataniko on∙angaha. Ia ramako chipani miksonganiara a·jao songdongenggipa manderangna sanna bannani a·bao nambata sanchakram biaprangko rike on·e apaladapatna aro rika cho·aniko dakenggipa biapni sepangjolo dongenggipa manderangko naljoke rakkina man·agita ong∙a ine u·iatangaha.
Rika cho∙aniko matchotkuja dipetna ia ramako chipaniko dakanggenchimoba rama chipaniara gari gorarangnasa ong·aigen aro re·ruragipa manderang re·rong bewalgita jakkalna man·aigen ine u∙iatangaha. Ia rika cho∙ani somoio songdongenggipa manderangko ma∙sichakgrike District Administration baksa bakrime ra∙gatgimin niamrangko ja·rikpachina WGH ni DC mol·molan baksa u·iataniko dakangaha.
