Dalmia Cement (Bharat) Limited, jean cement tarigiparangoni ge·sa nambatgipa ong·an baksana Dalmia Bharat Limited ni bak ong·e, Northeast gimiko pala sim·ani a·bao dilgipa ong·e uamangni bilsi 11 gapaniko da·al salni bako maniangaha. Uamangni bilsi 11 gapaniko maniani somoio Northeast a·dokrangni dingtang dingtang a·bao changgipa sapgipa sak 6 chadamberangna “Young Achievers Award” ko on·e mande ra·aniko dakangaha.
Ia award rangko Northeast ni Regional Head Padmanav Chakravarty aro dingtang dingtang dal·dalgipa officialrangni jakchi pakwatangaha. Awardrangko on·anganiara uamangni dingtang dingtang a·bao nambatgipa ong·e chu·sokgipa ong·anina seokako man·angaha. Seokako man·gipa sak 6 oni jawilwatko tarianio mingsinggipa A·chik rangoni saksa Dominic Sangma uni nambee jawilwatrangko tarianina award ko man·e A·chik jatna rasong chabeaniko ra·bataiaha.
Dominic Sangma uni jawilwat tariani a∙bao skanggipa Ma∙ama jawilwatko tarie adita boksis rangko man∙angaha. Una agreba re∙anggipa bilsio ua Rapture ba Rimdogittanga jawilwatko tarie a∙gilsakni dingtang dingtang Film Festival rango seokako man∙e boksis rangko man∙taie chu∙sokgipa ong∙angaha.
