Da∙al salni bako gitalgipa Pa Togan Nengminja Sangma Athletics Stadium (Track & Field Stadium) ko Chief Minister Conrad Sangma oprake on∙angaha. Ia Track & Field Stadium an Tura songjinmao skanggipa athletics ni a∙bao kal∙chakani biap ong∙a jean re∙baenggipa Meghalaya Games o a∙dokni kal∙susanasigipa chadamberangna nambee susanagita cholrangko on∙anggen ine Sangma parakangaha. Ia rikmangimin projectrangko a∙dokni kal∙susagipa chadamberangna da·alo ua pakwate on·angenga ineba Sangma aganangaha.
Apsan daken Track & Field, Artificial Turf ni kal∙chakram biap, Indoor & Outdoor Stadium aro bang∙a sports ni a∙bao kal∙chakna man∙gipa rika cho∙anirangko a∙dokni dingtang dingtang biaprango rikaniko dakangenga. Ia rikenggipa a∙damrangan re∙baenggipa bilsi 3 ba 4 ni gisepo Meghalaya a∙dokko sports ni a∙bao ge∙sa nambatgipa a∙dokrangoni ong∙nagita dakchakanggen ineba Sangma agananga.
Ia oprakani somoio Speaker Thomas Sangma, Tura ni MP Agatha Sangma, Sports Minister Shakliar Warjri, PHE Minister Marcuise Marak, Kharkutta ni MLA Rupert Momin, GHADC ni CEM Albinush Marak, Chief Secretary D.P. Wahlang, Sports and Youth Affairs ni Commissioner Secretary Vijay Kumar aro gipin officialrangba bakko ra∙angtokaha.
