Da∙al salni bako a·dokni Chief Minister Conrad K. Sangma Tura songjinmao Governor House aro Pa Togan Nengminja Sangma Athletics Stadium ko oprake on∙anang baksana Tura Christian Hospitalo Oxygen plant ko oprake on∙angjolaha. Ia oprake on∙ani somoio a∙dokni Speaker Thomas A. Sangma aro Mahendraganj ni MLA Sanjay Sangma ba dongpae bakko ra∙angaha.
Ian Garo Hills ni manderangna sanna bannanio ba sae dongenggipa manderangna aro rang·sitna neng·nikaniko man·enggiparangna oxygen on∙anio altubee dakchakaniko on·anggen ine Chief Minister aganangaha. Ia Oxygen Plantko Tura Christian Hospitalni bimchipe kam ka∙anichi, CM Special Development Fund aro dingtang dingtang on∙gilanirangchi rika cho∙anirangko dake matchotatnagita man·angaha.
Ia programko CBCNEI, Medical Board ni gitcham Chairman Dr. Sanggra A. Sangma tom∙aniko dilangaha aro rimchaksoani kattarangko Tura Christian Hospital (TCH) ni Medical Superintendent Dr. Editha W. Momin aganangaha. Ia Oxygen Plant ni bidingo TCH ni Surgeon Dr. Siddhart K. Sangma agantalataniko dakangskaaha. Ia tom∙ani bako Wadanang Youth Choir aro Bilsando Ch. Marak uamangni knatobegipa ku∙rang rangchi ring∙mesokanikoba dakangjolangaha.
