WGH, Selsellao SBI branch ni tik ong·e kam ka·jaengani bidingo ua jolo songdongenggipa manderang bang·a neng·nikanirangko chagrongenga ine u·inagita man·e Selsellani ASWA aro FKJGP dolrang nirokatchinagita a·jani Deputy Commissioner na chitti sedoataha. Chong·motan Budbar salo Bank ko chiprongengani a·selo Bristibar salo bajar anti cha·giparang neng·nikaniko chagrongenga maina Budbar salo tangka paisarangko bikotna aro bank o gipin nanga kamrangna re·bagiparang jakrara re·angpilna nangrongenga ine u·iatangaha.
Bank ni passbook ko update ka·na gital kolrangko ra·bae on·jani a·sel, ua jolni manderang bilsi bonga ong·pilomangba update ka·na man·chipgija dongenga jeon tangka paisarangko chipani ba bikotaniko name dake see rakkianiko u·i ma·sina man·jaenga. Unbaksana ATM dongjani a·selo tangkatangko bikotnagita man·derang bang·a neng·nikanirangko chagrongna nangenga ine janapataha. Battanggimin 2021 bilsio ASWA aro FKJGP dolrang ATM ko ra·bae on·chinagita mol·molmanahaoba da·ona kingkingba ra·bae chu·sokate on·kuja ineba chittio janapatjolaha.
Ia pilak obostarangko niate ASWA aro FKJGP, WGH ni DC aro Tura Chandmari, SBI Regional Branch, Selsella Branch ni SBI ko ta·rake nirokatpachinagita mol·molangaha.
