Sorkarini a∙doko ge∙gittam Medical College rangko rika cho∙anirang baditana chu·sokangengani bidingo report rangko on∙chinagita Health Minister Ampareen Lyngdoh ge∙etangaha. Re∙anggipa bilsini August 25 tariko Cabinet ni chanchirimanio a∙doko dam gittam Medical College rangko riknagita rai on∙angaha jean sorkarinigita Tura Medical College aro Shillong Medical College ong∙a aro Ribhoi a∙jao damsa College ko Private ong∙e chalaiangskana tik ka·angaha.
Medical College rangko rikna nanggipa niamrangko Cabinet aro department ni manderang baksa tom∙aniko dake ja∙ku de·e kamrangko ka∙anggen maina ma∙mong sorkarinigitaba college rangko riknagita adita niamrango pangchakesa rai ko on∙ronga ine Lyngdoh aganangaha. Re∙anggipa somoirango Medical College rangko 2024 bilsio matchotatna agangipa kattarangni bidingo sing·anina, da∙o dipet January jasan ong∙kuan baksana kamrang a∙bachengahani gimin ru∙utgija somoirangni gisepon matchotnagita ka∙dongsoenga aro chingna nanggipa somoirangko chu∙ongagita on∙a nanga ine Lyngdoh aganchakangskaaha. MDA-I sorkarini je gadangona ia kamrangko ka∙angmanaoni da∙o ong∙enggipa MDA-II sorkari ia pilak kamrangko ta∙rakate Tura Medical College ko rikaniko dakangtaingaha ineba ua aganangaha.
A∙doko Medical Collegerangko rikani mingsa altugipa kam ong∙ja maina Assam a∙dok baksa tosusaaniko dakgenchimode an∙ching a∙doko a∙a chia chu∙onggijani mingsa neng∙nikani ong∙an baksana sapgipa manderangni Meghalaya ona re∙bae kam ka∙ani, dongani biap aro technical ni bidingo kam ka∙giparangna nanggipa kolrangko on∙anian namen man∙dikgipa kam ong∙a. Iarangko gisiko donesa sorkari kamrangko ka∙nagita man∙a aro indakgipa kamrangko matchotatna chu∙ongagita somoirangko nanga. Indakgipa neng∙nikanirangko cha∙grongesa NEIGRIHMS gita dakgipa ge∙sa mongsonggipa hospitalko bang∙a bilsirangni ja∙mansa an∙ching namgipa bimang ong∙anikoba niknagita man∙enga ine bon·kame Lyngdoh aganangaha.
