WGH Dadenggre Sub-Division ni ning∙o Government Lower Primary skulo skigipani kamna seokako man·giminrang uamangni porikka aro interview o name chu∙sokani giminsa seokako man∙aha ine Education Minister Rakkam Sangma parakataha. Ia kamna Interview panel ko rimpaniara porikka ra·anio nambatgiparangko basee seokna miksongen panel ko donataha ineba ua aganangaha.
Ia kamna tribal aro non-tribalni bidingo maming sing·dona nangani dongja maina ia kamara a·dokni job reservation policy nigita open category aro unreserved category ni ning∙o ong·a. Seokako man∙gimin skigiparangni bimungrangko parakataniara, uamangni interview porikkao mark rangko bang∙bate man·anikrisa ong∙a ine Sangma agandapangaha.
Re·anggipa Bristibar salo a·dokni Akhil Bharatiya Vidyarthi Parishad (ABVP) dolrang, kamna seokako man·giminrangko dontongatchina aro iani bidingo am∙sandianiko dake kamna apsan rimnapaniko dakchinanagita dabiangaha. ABVP ni Secretary Tengku M. Marak ni Chief Minister Conrad K. Sangma na chittio janapatanigitade seokgiminrangoni UR category o sak 34 candidaterangoni saksaba tribal dongja ine sing·doaniko dakangaha. Indake ong·genchimoba Dadenggre Sub-Division ni ning∙o kam nakatgipara chu∙gimik 230 donga jeon 15 percent de reservation policy nigita unreserved category na chamgimin ong·a ine Sangma parakataha.
