Da·al attamni bako 5 gipa Meghalaya Games ko Tura P A Sangma Stadium-o a·songni President Droupadi Murmu oprake on·angaha. Ia programo a·dokni Governor Phagu Chauhan, Chief Minister Conrad K. Sangma, Assembly Speaker Thomas A. Sangma, Tura ni MP Agatha Sangma, Education Minister Rakkam Sangma, Sports & Youth Affairs Minister Shakliar Warjri, PHE Minister Marcuise N. Marak, Power Minister A T Mondal aro gipin Cabinet Ministerrang aro Officialrangba dongpae bakko ra·angaha.
Ia 5 gipa Meghalaya Games ko ra·baaniara adita bakrango gisik ra·na krabegipa ong·a maina ian Tura songjinmao skanggipa changna ong·enga aro iako Shillong songjinmaona agre ong·atangkujachim. Unbaksana ia changosan jatni kal·anirangkoba skanggipa changna a·bachengatangenga aro skanggipa changna India a·songni President ni jakchi oprake on·gipa ong·angaha.
Ia programni bako a·songni President, North East India ni kal·susaani a·bao tang·doaniko nike aro jattangni kal·anirangko changgipa sapagiparang ban·ga ine rasong chaate aganangaha. Dingtang dingtang jatrang ku·cholsan ong·e donganiara a·songko silata aro iarangko jakkale kal·susaani a·bao India a·songko niksengatchinagita didiangan baksana changgipa sapgipa Tribal rangna nanganirango dakchakaniko on·china, jedakode uamang kal·susaanirango nambate dakangnagita man·gen ine Murmu aganangaha.
Ia oprakani somoio Chief Minister ni jikgipa Mehtab Sangma Presidentni re·baanina katchabee rimchaksoaniko mesoknagita kal·susaanirangko gisik ra·na bostu mingsako, dakmandako aro Garo Hills ni changgipa sapgipa manderangni jakchi sike koe tarigipa Eri Silk Saree ko on·angskaaha.
