Da·al salni bako a·songni President Droupadi Murmu Baljek Airport o Self Help Group aro Village Organisation dolrangna ong·atgipa programo dongpae bakko ra·angaha. Ia programo hajal ni hajal SHG ko dilenggipa me·chikmarang katchabee uko nichaksonagita aro tom·anio bak ra·nagita sokbatokaha. Ia programo a∙dokni Governor Phagu Chauhan, Chief Minister Conrad K Sangma, Community & Rural Development ni Minister Abu Taher Mondal, Education Minister Rakkam A Sangma aro gipin dilgiparangba bakko ra∙angtokaha.
Ian skanggipa changna a·songni President Meghalaya a·dokona sokbaani ong·a aro sokbagipa me·chikma dol sakantinan President uni namgipa didianikoba on·angaha. Songsulo me∙chik dolrang dingtang mancha an∙tangtangni dakna nangnikgipa kamrangko jakgitel ong∙en ka∙nagita man∙a nanga aro sorkarini ra∙bagipa cholrangko ka∙e cha∙nagitaba gonggipa ong∙na nanga ine President aganangaha. Tom∙aniona re∙bagipa pilak me∙chik dolrangni SHG dolrango bimchipe kam ka∙anirangko nikeba ua uni kusi ong∙anikoba parakangaha.
President ni ia tom∙aniona aro a∙dokona re∙bae nianganiko dakanina skotong Minister Conrad Sangma uni mittelpilskaaniko aganangaha. Tom∙anio donggipa manderangna aganengon Sangma uni sorkariko chalaina skang a∙doko 4600 SHG rangna komiakosan 2018 bilsiona kingking niknagita man∙a ine janapangaha. Iako aganengon, re∙anggipa bilsi 6 o 45000 SHG rangko bikote on∙a man∙e bang∙a namgnirangko ia sorkari ra∙banagita man∙aha ine ua aganangaha.
Ia tom·anio ge 1422 Village Organisation (VO) rangna gong 25 crore ko on·angan baksana ge 1083 Self Help Group (SHG) rangnaba gong 32 crore tangka paisanigita Bank Loan rangkoba on·angaha. Una agreba ‘Lakhpati Didi’ nigita sakgni me·chikmarang jean SHG ni bako ong·giparangna bilsio lakh 1 tangkarangna bate kamaina man·ani gimin boksis rangko on·angaha. Uasan ong·aigija, saksa Banking Correspondent jean manderangna tangka paisanigita bimchipe dakchake on·anina unaba boksisko on·angjolangaha. Bon·kame, gitalgipa Integrated Administration Complex ko Tura o riknagitaba a·songni President pangchakani ro·ongkoba virtual mode o songe on·angjolangaha.
