Da·o ong·enggipa 5 gipa Meghalaya Games o bak ra·giparangna cha·ani ringani bidingo neng·nikaniko man·e aganjanapatanirangna, Department of Sports and Youth Affairs aro Meghalaya State Olympic Organization jean Organising Committee ni memborrang ong·e chalaigipa dolrang adita agantalataniko dakangaha.
Ian Tura o skanggipa changna Meghalaya Games ko ong·atenga aro a·songni President re·bae oprakaniko dakangaha jeon susagiparang, chrok mesae mesokgiparang, chadamberang aro sokbagipa manderang bakko ra·e skanggipa salko chu·sokatna man·angaha. Ia oprakani somoio adita susagipa chadamberangna cha·ani ringani sualanio tikchangani gimin neng·nikanirangko chagrongna nanggenchimoba, jako ra·e kam ka·giparang iani bidingo ta·rake nirokate attamni 7 bajio susana re·bagiparangna mi attam ko nambee tarie donsoskaaha ine u·iatangaha.
Ia Meghalaya Games o adita bakko ra·giparang neng·nikaniko cha·grongna nangahanina chinga name mancha nipiltaianiko dakenga aro iarangko namdapatnagita Organising Committee nigita kal·susagiparangna namgipa cha·ani, Canteen rangko somoigita kuliani aro nanganirangko nirokatna jotton ka·angenga ine MSOA ni Working President John Kharshiing parakataha.
