A∙chik Holistic Awakening Movement (AHAM-CEB) dolni President Georgeprince Ch. Momin, adita dabianirangko mikkango done kamrangko nirokatchinagita a∙songni President Droupadi Murmu-ni Turaona re∙baani somoio memorandum ko on∙angaha.
Memorandum-o janapgimin dabianirangara Turao Winter Capital ko songe on∙china didiani ong∙a, jeon uamang Turani gamchataniko mesokna skanggipa Provisional Meghalaya Legislative Assembly-ko 1970 bilsini April 14 tariko Tura District Council Hall-o sokachakaniko janapangaha. Turao Winter Capital ba Second Capital na pagitchamrangni nikjumangsoani aro dingtang dingtang organization ba dolrangni neng·takgija dabiengani ong·a jeon jat gittamna apsan namgniko ra∙bana man·agita, pagitchamrangni chanchie tik ka∙anggimin ong∙a ine AHAM dolrang memorandum o janapataha.
Skanggipa Assembly ko GHADC o ong·ate chanchirimanio a·dokni jat gittamna (Khasi, Garo aro Jaintia) apsangrik namgnirangko ra·bana chanchirimaniko ra·chakangaha jeon indake namgipa ja·ku de·aniko saoba gitcham dilgiparangni somoio gimaataha ineba janapataha. Chengo a·dokni dilgipa aro a·songo mingsinggipa P A. Sangma sagini somoio pagitchamrangni nikjumanganiko dingtang dingtang cholrangchi ra·banagita jotton ka·begenchimoba, una chakpaanio komiani aro uko ja·rikgiparangni niksamsoe ka·na nanggnirangko dal·e ra·gijani a·sel chu·soknagita man·angjaha ineba janapangaha.
Beben Turako Winter Capital songe on·a bang·a neng·nikarang gnang maina rika cho·anirangko bang·en dakna nangkuengani a·selo bang·a tangka paisarangko jakkalna nanggenchimoba, ru·uta somoina senge dongenggipa miksonganiko chu·sokatpachina AHAM dolrang mol·molangaha. Unbaksana minggippin dabianirangara, galchipe donenggipa Baljek Airportko chalaie a·bachengatchina, somoigita Dhubri-Phulbari dolongko matchote on∙china aro Hilli Tura Corridor Projectko ta·rakale kam ka∙na a∙bachengatchinaba didiangjolaha.
