A·chik Students Welfare & Association (ASWA) aro Federation of Khasi Jaintia & Garo People (FKJGP) dolrang Selsella ni ning·o donggipa biaprango burungni mongmarangni roramanirang batrikrikenganina WGH Divisional Forest Officer na chittiko see u·iatan baksana nirokatpachina mol·molaniko dakataha. Batanggimin antirangonin mongmarang manderangni dongchakenggipa nok sambarangona re·baaniko nikna man·enga ine chittio janapataha.
Manderangni songdongenggipa biaprangona mongmarang re·bae roenganiko nikna man·e namen kenbeani ong·an baksana mongma baksa mande nanggrike a·sel ong·aoniko naljoke rakkina man·agita, ta·rakkale nirokatpachina uamang mol·molataha. Una agreba manderangko a·sel ong·aoniko naljoke rakkina man·agita aro mongmarangkoba mande songdonggipa biaprangoniko maming saknaatagri a·rikgalatna Wildlife department-ni kam ka·enggipa dolrangko watatchina mol·molangaha.
Unbaksana songsalo indake matburingrangni bidingo u·i ma·sie ra·e mande baksa nanggrikanirangko komiatnagita mikrakatani programrangkoba ong·atchina ASWA, FKJGP Selsella ni General Secretary aro ASWA Bhajamara-ni President mol·molangjolaha.
