South West Garo Hills a∙jani District Selection Committee (DSC) aro Electoral Registration Office, South Western Zone AHAM dolrangni RTI ka∙doani bidingo aganchakaniko dakanganina AHAM dolrang suk ong·gijaniko parakataha. AHAM dolrangni batanggimin bilsio DSC ni gita ge 10 kamni biaprangna Lower Division Assistant (LDA) na porikka ra∙e seokanina kusi ong∙jae November 15 2023 tariko ta∙rake aganchakaniko on∙china Public Information Officer (PIO) o RTI ka∙doangaha ine parakataha.
Uamangni RTI ka∙anio mongsongbate Viva Voice-ona badita sak manderang seokako man∙aha, porikkako segipa sakprakni chu∙gimik marks man∙anirangko mesokchina, porikka sechakgipa lekka bichit aro computer-o jakchi dokani ta∙rakaniko porikka ra∙aniko mesokchina dabiangaha. Unbaksana seokako man∙gipa manderangni Meghalaya a∙doko songdongkamgipa ong∙aniko mesokna kamna galani somoio on∙chapgipakoba mesokchina didiangaha.
Indake ong∙genchimoba AHAM dolrangni janapatanigitade, 2018 bilsio kamna nakataniko parakatani somoio saksa LDA kamna seokako man∙gipa Meghalaya a∙doko songdongkamgipa ong∙ja indiba Assam a∙dokonisa ong∙a ine uni election ID card-o u∙inagita man∙aha. Ua 2023 bilsiosa gital dake Electoral Registration Office, Ampati o dorgastoko on∙aha ine uamang janapataha. Indake kakket ong∙gijagipa lekka pancharangko mesokgipa manderangni bimingko ra∙chakani somoion den∙gale galna nanga ine AHAM dolrang suk ong·gijaniko parakataha.
Una agreba chu·gimik sak 25 porikkako segipa manderang donggenchimoba, uamangni sing∙doanina Public Information Officer (PIO) 20 percent mangnigitasan aganchakaiaha ine suk ong∙gijaniko AHAM South Western Zone ni General Secretary Wester G. Sangma parakataha. Bang∙bata sing∙anirangnan ua mandeni parakna kusi ong∙gijanio ba jechakani a·selo pangchakani gnang talate on∙a man∙jaha inesa janapatskaaha. Ia kaketgijagipa kamrangko jegale aro kusi ong∙gijaniko parake songdongenggipa manderangni namgnina iani bidingo niamo pangchake mikkangchi ja·kurangko de·angkugen ine AHAM dolrang parakataha.
