West Garo Hills Chidaogre songo gisikni gita bilgrie saaniko man·gipa depante Sengjon Sangma an·tangni bilsi 45 ong∙gipa ma·gipako ka·saninggija dake so·otanina A·chik State People’s Front (ASPF) dolrang je·galaniko dakangaha. Dosi dakgipa mande ma∙gipatangko so∙ote kate dongengkuani gimin uko banoba saobarang nikgenchimode sepangbatgipa pulis thanaona re·ange ta·rake koborko on·pachinagita ASPF ni dilgiparang mol∙molataha. Uko rim∙gija donaiode mikkangchi da·o ong·anggipa a·selna bate kenbegnigipa aro u∙isokgija kamrang ong∙naba gnang ine ASPF u∙itaha.
Bilsi 45 ong·gipa me·chikma jean an·tangni depanteni jakchi so·otako man·aniara namen kenjagokani ong·a aro ian an·ching an·tangtangni be·en bimang baksana gisiknigitaba tom·tome rakkina simsakna nanganiko didiatani ong·a. Indake gisikni gita bilgrie sagiparangko ta·raken a·sel ong·na skangan namgipa sanna bannaniko aro psychiatrist rangna mesokaniko daksonagita nanga ine ASPF ni General Secretary Bernita Marak talatangaha. Una agreba me·chikrangni naljokanina aro songo noko indakgipa a·selrangoniko champengsona man·agita mikrakatani programrangko ong·atchinagitaba ASPF ni gita sorkariko mol·molanikoba dakangjolaha.
