Mijal salni bako Meghalaya Cricket Association (MCA) ni kal·chakram biapo gnigipa salo Ranji Trophy ko Meghalaya aro Nagaland dolrang kal·angaha. Meghalaya dolni Ram Gurung dingtangmancha wicket 6 rangko ra∙nagita man·aha. Nagaland dolrang kal·a gimiko 128 run rangkosan man·aiaha. Akash Kumar Choudhary chu∙gimik kal∙anio 79 run rangko on∙e wicket 10 ko ra∙na man∙aha jeon mijal salni bako ua run 39 ko on∙e wicket 3 ko man·angskaaha.
Meghalaya dolni cricket kal·giparangoni Jaskrat Singh Sachdeva, doltangna 75 runko 124 ball o man·e on·gipa ong·aha. Ram Kumar aro Jaskirat Singh uamang sakgnian skanggipa season oni Ranji trophy o nambatgipa kal·giparang ong·e first-class level o ong·enga.
Nagaland dolrang skanggipa innings-o kal·anio 72 kosan man·e gnigipa innings o 196/7 ko man·aha. Meghalaya dolrang 108 run rangko man·dape 304 run rangko bon∙kame man·e 232 run rangchi Nagaland na bataha. Jaskirat run 1 run 2 rangko ra∙e 4 runko changchet doknagita man·aha aro Akash 20 run ko 87 ball o man·angskaaha. Uamang sakgnian skanggipa innings o Meghalaya dolna nambee kal∙e on·angaha.
Nagaland-ni gnigipa innings ko mijal attamo a·bachengate run 52 ong∙mitingo wicket 2 kosan ga∙akatkugenchimoba bangki wicket 8 dokgiparang run 52 magmangkosan man∙dape sirikna nangaona ga·akaha. Ram aro Lerry Sangma changgittam ga·akatgija robolko rim·na gita man·aha jeon Akash bon∙kamgipa wicket ko ra·e Meghalaya dolko chenagita dakchakaha. Akash Kumar Choudhary kal·anio nambee robolko go·anina player of the Match ni bimungko man·angaha.
Meghalaya dolrang January ni 26 tariko changgipin kal·aniko Anand, Gujarat o Mizoram baksa kal·angskagen.
