South Garo Hills Baghmara-o salgnina ong·nasienggipa Tyisam festivalo nitobegipa jatni ring·anirang, changa sapaniko dakmesokanirang, dingtang dingtang dokan dakgiparang aro cha·anirangko palaniko dake da·al saloni a·bachengataha. Ia festivalko, a·dokni Speaker Thomas Sangma mongsonggipa sokgipa ong·e oprake on·angaha jeon Education Minister Rakkam Sangma aro gipin official rang dongpae bakko ra·angaha.
Ia chang Tyisam festival manianisan ong·aigija Exibition cum SHG mela-ba ong·gen jekon District Administration aro MSRLS dingtang mancha NABARD ni dakchakanichi ong·atangenga. Ia manianio chu·gimik ge 75 dokanrangko kulina on·aha jeon me·chikrangni SHG aro gipin songdonggiparangni tarigimin bosturang jekai boloniko solgipa repgipa, wata chenga, ringani, cha·ani aro gipin bosturangko pala sim·aniko dakangenga. Iasan ong·aigija kal·atanirang, noksa salani, changa sapaniko dakmesokani, pul aro me·surangko mesokani, mingsinggipa dokgipa damgipa dolrangni ring·salanirangkoba nikangna man·gen. Unbaksana dingtanggipa kal·anirang jekai zip lining, trampoline aro hot air balloon gadoe bilanikoba dakna tik ka·angaha.
Da·alo ia manianiko oprake on·ani somoio, mongsonggipa sokgipa gamchatgipa lekka pancharangko SHG rangna dakchaknagita on·angan baksana dam 38 songo dilgipa dolrangna gong 1,06,50,000 tangkarangko on·angaha.
