Da·al salni bako South Garo Hills ni Nilwagre Health & Wellness Centre ni ning·o donggipa Lower Rongdotchi songo Viksit Bharat Sankalp Yatra (VBSY) programmeko ong·atangaha. Apsan daken West Garo Hills a·jani Akarok Sub-Centre ni ning·o donggipa Rongballugre songo Village Health Nutrition Day aro ABHA campaignko health department-nigita songo noko sanna bannaniko dangdike on·giparang mijal salo ong·atangskaaha.
Ia ong·atanggipa campaign ba programme-o sanna bannani gadango sorkarini adita dingtang dingtang scheme rangni bidingo agantalate on·angaha. Unbaksana rongtal an·talani, Non-Communicable Disease aro TB sabisiko porikka ra·e niani, Leprosy sabisini gimin talatani, family planning ba nokdang dake bi·sa atchiatani bidingo tarisamsoani, be·en bimangnigita an·seng baljoke dongani aro an·seng baljoke dongna ranta ka·ani bidingrangoba tom·aniona re·bagipa manderangna agantalate on·angjolaha.
