Congress-ni dilgipa Champion R. Sangma aro Songsak Block Congress Committee (BCC) ni Executive memberrang kamtangtangko wate BJP baksa bakrimaniko dakangaha. Uamangko mijal salni bako BJP State President Rikman Momin, State Vice-President Dipul Marak, Riya Sangma, Bernard N. Marak, State ST Morcha President Thomas Marak, State Minority President S. Rehman, District President Boston Marak aro partyni dilgiparangko, West Garo Hills ni Tura jilao rimchaksoaniko dakangaha.
Garo Hills ona dingtang dingtang namdapatanirangko aro a∙songko silroroatna, a∙songni PM Narendra Modi ni kam ka∙na miksonganirangko nike aro namnikpae uamang BJP baksa bakrimnagita ja∙kuko de∙angaha ine Sangma parakangaha. Unbaksana re∙baenggipa Lok Sabha pu·onanina tarisamsona kamrangko ka∙nagita manchie BJP dolna on∙kange kamko ka∙angnagitaba Sangma janapangaha.
