South Western Zone, Ampati ni A∙chik Holistic Awakening Movement (AHAM) dolrang ia bilsini re∙anggipa January 23 tariko, Assam Meghalaya sima ari jolni Takuranbari aro Ishakuri songrango Assam a∙dokoni gipin jatrang niamgri Meghalaya a∙dokona napdrabae songdong a·chae dongenggiparangni bidingo niamnigita nanga ja·kurangko de∙china SWGH ni DC R P. Marak na chitti see didiataha.
Re∙anggipa bilsini December 16 tariko AHAM dolrang Takuranbari ni A∙king Nokma aro songni nokni manderang baksa re∙ange nieon, Takuranbari aro Ishakuri jolo niamgri bang·a gipin jat aro Assam a∙dokni manderangni songdongenganiko nikenagita man∙aha. Unbaksana uamangni pilak lekka pancharang Assam a∙dokni ong∙an baksana Meghalaya a∙doko donggenchimoba uamang pilak namgnirangko aro dakchakaniko Assam a∙dokoniko man∙enga ine niknagita man∙aha jekai Jal Jeevan Mission (JJM) scheme, PMAY (low-cost house) aro Nokma ba songni nokni permissionko ra∙gija gipinchini re∙bae nokrangko rike para on∙e cha∙anirangkoba niknagita man∙enga ine AHAM dol janapangaha.
Una agreba indakgipa manderang bang·a changon badingsrukani, kajia golmal ka∙ani, doka satani ba bang·a namgijagipa botnamrangko ra·baronga jean Indian Constitution ni Sixth Schedule niamko pe∙ani ong∙a ine AHAM dolrang janapatha. Iani bidingo Uamang 2021 aro 2022 bilsio Nokma aro songni nokni manderang baksa namgrime chitti sedoanirangko dakangaha ine gisik ra∙atan baksana mikkangchi maming a∙selgri naljoke dongna man∙agita nanga ja·kurangko de∙china AHAM dol DC ko didiangaha.
