East Garo Hills Williamnagar block ni ning·o ga·akgipa Dambo Rongdeng SSA UP aro Rongjeng block ni ning·o donggipa Government L.P. skul nokrangni namen namjabeahanina, songni manderangni neng·nikanirangko janapatani gimin mijal salni bako Rongjeng Regional Unit AHAM dolrang re·ange nirokeaniko dakangaha. Skul nokrangni namjabeaniko nike, jako ra·e kam ka·enggipa department rangna chitti rangko sedoaniko dakangan baksana ta·rake taridape on·china mol·molanikoba dakanggen ine AHAM dol ku·chakbaaha.
Ua songni manderangni agananigitade janapgimin damgni skul nokrangkosa taridapanikosan nangaigija adita nanganirang jekai water sanitation, Awas plus, Anganwadi store room, Sub-Centre ni babilsi, office ni pakmarang be·aniko taridapna, Dambo Wari Kada oni Dambo Rongdeng ona re·gipa PMGSY ni rama jekon matchotatkugija donenggipako taripilchina aro mobile tower rangkoba nirokatpachina AHAM dolrangna janape mol·molangaha. Indake songni manderangni dakchakani baksana, kang·kare kae jako ra·e kam ka·enggipa department rangna dorgasto rangko on·anggen ine AHAM Eastern Zone ni President koborna parakataha.
