Garo Hills o gimaangenggipa Huro mangsa bijoli nangako man·e, Gondenggre aro uni wilwilgipa songrango manderangni nok sepangrango male roanirangko niknagita man·enga ine songni manderang u·iatangaha. Uni jak samsa bijoli nangani a·selo kam ka·jae aro malruranagita subita ong·jae neng·nikaniko man·e dongenga ineba parakataha.
Bang·bata changrango Hurorang cha·ambae sringgipa bijolini silitingrango rim·dapmane a·selo ga·akaniko knana man·ronga. Batanggimin salrangoba Tura a·brioni cha·amna ong·onbagipa Hurorang bijoli nange sianiko an·ching niknagita man·angaha. MeECL department aro Wildlife department rango songdongenggipa manderangni ia sringgipa bijoli silitingrangko maiba cholko dakchina janapgenchimoba maming ja·kuko de·jaenga ine kobor ra·timgiparangni sing·e nion u·ina man·aha. Ian gimaangenggipa aro ripingna nangenggipa Hurorangni janggiko indin gimaatani ong·enga.
